Nga Vitjon Nina
Nigel Farage e ka ndërtuar gjithë narracionin e tij politik të muajve të fundit rreth emigracionit të jashtëligjshëm dhe krimit që buron prej tij, me në shënjestër të veçantë shqiptarët, për të cilët ka arritur deri aty sa të thotë se 1 në 50, janë në burg.
Diçka e tillë do të nxiste edhe një debat të ashpër virtual mes tij dhe kryeministrit Edi Rama, sa i takon nivelit të krimit mes emigrantëve shqiptarë, të cilët edhe pse jo në një numër të specifikuar në Mbretërinë e Bashkuar, mendohet se janë mbi 100 mijë jozyrtarisht.
Një prej aspekteve kryesore të populizmit të Farage, është edhe propaganda e tejskajshme që ai përdor kundër shqiptarëve dhe kombësive të tjera, duke i etiketuar etnitë jo evropiano-perëndimore si përtej kriminale, deri edhe përdhunuese dhe aktorë kryesorë të përdhunimeve në ishull.
Në mungesë të shifrave, Farage gjithnjë lëshon hamullinë jofaktike të tij në terma të përgjithshëm dhe duke i vënë shqiptarët në çdo rast në krye të listave për krime të tilla.
Por, nuk është kështu në fakt.
Në një publikim të dhënash së fundmi të bërë nga Qendra për Kontrollin e Migracionit në Britani, reflektohet në fakt se në Londër, shqiptarët nuk futen as në top 5 kombësitë me më shumë krime seksuale, ku kryesojnë etni si afganët, eritreasit, apo algjerianët.
Te shqiptarët, përllogaritet se në 10 mijë persona, 35 janë autorë të krimeve seksuale, sipas QKM-së.
Farage në këtë spektër e vijon ende propagandën.
Vetëm në ditët e fundit, ai ka theksuar dorën e hekurt që do të ketë për dëbimin e emigrantëve të jashtëligjshëm, duke lënë fillimisht edhe hije dyshimi për dëbimin e grave dhe fëmijëve. Por, më pas u tërhoq nga kjo.
Një retorikë ndërkaq që e ka marrë në dorë liderja e konservatorëve, Kemi Badenoch, e cila ka thënë se ajo do të shkojë më larg se Farage dhe do të dëbojë edhe gratë dhe fëmijët emigrantë të jashtëligjshëm.
Mirëpo debat të madh ka edhe lidhur me shifrat zyrtare nga Qendra Kombëtare e Migracionit në Britani, pasi ajo tregon se si fjala bie, për krime seksuale, 74 në 10 mijë afganë kanë kryer krime seksuale sipas raportit.
Por, sipas një publikimi të Guardian, me gjasë këto shifra dalin të tilla sepse nuk merret parasysh numri real i emigrantëve të jashtëligjshëm afganë në Londër, i cili është rritur në mënyrë të ndjeshme prej vitit 2021.
“Statistikat ka të ngjarë të jenë të bazuara në një nënvlerësim të konsiderueshëm të numrit të shtetasve afganë dhe eritreanë në Mbretërinë e Bashkuar – që do të thotë se krahasimi me normat britanike nuk ka gjasa të jetë 20 herë më i lartë”, theksohet në një publikim nga Guardian.
Në të tilla kushte ndërkaq, e gjithë çështja është se Farage dhe të tjerë, vijojnë që përmes këtyre shifrave “zyrtare”, të injektojnë në popullatë propagandën e tyre me qëllime elektorale.
