Në një ceremoni solemne të zhvilluar në ambientet e Këshillit Bashkiak, Gramos Sako mori zyrtarisht detyrën si Kryetar i Bashkisë Tepelenë, pas betimit të dhënë para anëtarëve të Këshillit Bashkiak.
Në këtë aktivitet morën pjesë edhe drejtuesja politike e Qarkut Gjirokastër, Mirela Kumbaro, si dhe deputeti i zonës, Tërmet Peçi, të cilët përshëndetën këtë moment të rëndësishëm për drejtimin e ri të bashkisë.
Në fjalën e tij gjatë ceremonisë, kryebashkiaku Sako shprehu mirënjohjen për besimin e dhënë nga qytetarët dhe theksoi se ky mandat për të është një përgjegjësi e lartë dhe një angazhim i palëkundur në shërbim të çdo banori të Tepelenës.
“Ky betim nuk është thjesht një akt formal, por zotimi im i sinqertë për të qenë kryebashkiaku i të gjithëve, i çdo lagjeje, çdo fshati dhe çdo familjeje, pa asnjë dallim. Dera e zyrës time do të jetë gjithmonë e hapur për çdo qytetar, ide dhe shqetësim,” u shpreh Sako.
Ai theksoi se nis një kapitull i ri për Bashkinë Tepelenë, i cili do të ndërtohet mbi bashkëpunimin, transparencën dhe fokusin tek nevojat e komunitetit.
Kryetari i ri u zotua për një bashki moderne, efikase dhe më pranë qytetarëve, duke vënë theksin në zhvillimin urban, përmirësimin e infrastrukturës në çdo fshat, mbështetjen e të rinjve, nxitjen e agroturizmit, sipërmarrjes dhe sektorëve që gjallërojnë ekonominë lokale.
“Tepelena meriton më të mirën. Me përulësi, vendosmëri dhe dashuri për qytetin tonë, fillojmë sot punën për të ardhmen që meriton kjo bashki,” përfundoi Sako.
