8 vite më parë qendra e integruar e ofrimit të shërbimeve publike, ADISA, u inagurua në Gjirokastër si një risi për t’ju ardhur në ndihmë qytetarëve. Por me kalimin online të pjesës më të madhe të shërbimeve publike, kjo qendër u mbyll rreth dy vite më parë.
Përtej kësaj ajo cfarë ka ndodhur kohët e fundit është e turpshme. Ambientet janë shkatërruar pothuajse plotësisht ndërkohë që sic shihet në pamjet e publikuara në rrjetet sociale, shumë dokumente mbase edhe me të dhëna sensitive, janë hedhur ngado brenda hapësirës ku dikur ofroheshin shërbime për qytetarët.
Nuk dihet cilët janë autorët e këtij vandalizmi, i cili ka ndodhur ngjitur me komisariatin e policisë Gjirokastër, pasi dy godinat janë pranë njëra-tjetrës.
Më 23 tetor të këtij viti, policia konfirmon zyrtarisht shkatërrimin e kësaj qendra, por pa bërë me dije cilët janë autorët. Thjesht tregon se po punon për identifikimin dhe kapjen e tyre.
“Specialistët për Hetimin e Krimeve të Komisariatit të Policisë Gjirokastër referuan materialet në Prokurori, për veprën penale “Shkatërrimi i pronës”, pasi dje, janë thyer xhamat e një godine (aktualisht jofunksionale) dhe janë dëmtuar disa pajisje kompjuterike dhe mobilje. Po punohet për identifikimin dhe kapjen e autorit/ëve”, thuhej në njoftimin e policisë.
Cfarëdo që të ketë ndodhur, pamjet janë vërtet të rënda dhe aq më tepër kur ngjarja ka ndodhur në qendër të qytetit e pranë policisë, jo në në ndonjë zonë periferike ku ndoshta mund të mos vihej re.
Qendra, e hapur në vitin 2017 si pjesë e programit kombëtar për modernizimin e shërbimeve publike, ka ofruar në Gjirokastër një seri shërbimesh të rëndësishme, duke përfshirë gjendjen civile, pasaportat, çështjet kadstrale dhe dokumentet administrative. Hapja e ADISA-s në qytet ishte pjesë e investimeve qeveritare për qendra “one-stop-shop”, që synonin t’u lehtësonin qytetarëve aksesin në zyrat publike pa udhëtime të panevojshme.
