Këshilli Bashkiak i Gjirokastrës ka miratuar buxhetin e Bashkisë për vitin 2026, duke hapur rrugën për realizimin e një sërë investimesh të rëndësishme në infrastrukturë, arsim dhe shërbime publike.
Kryetari i Bashkisë Gjirokastër, Flamur Golemi, bëri të ditur se brenda vitit 2026 do të përfundojnë dy projekte madhore për qytetin: rikonstruksioni i plotë i shkollës “Urani Rumbo” dhe ndërtimi i Tregut të ri Fruta-Perime në zonën “18 Shtatori”.
Sipas tij, buxheti i miratuar parashikon gjithashtu financimin e një sërë ndërhyrjesh në rrugët e brendshme të qytetit dhe fshatrave, me qëllim përmirësimin e qarkullimit për këmbësorët dhe automjetet. Investime të tjera do të realizohen në kanalet vaditëse dhe kulluese, rrugë rurale, ndriçim publik, sinjalistikë, si dhe ndërtimin e lerave dhe infrastrukturave të tjera mbështetëse.
Golemi theksoi se, pavarësisht nevojave të shumta, Bashkia ka detyrimin të shpërndajë buxhetin në mënyrë të drejtë dhe sipas prioriteteve, duke kursyer dhe përdorur me eficiencë fondet e taksapaguesve.
Një tjetër lajm i mirë, sipas kryebashkiakut, lidhet me punonjësit e shërbimeve publike dhe të Mbrojtjes nga Zjarri dhe Shpëtimit, të cilët edhe këtë vit do të përfitojnë bonus fundviti.
“Besimplotë se viti 2026 do të jetë një tjetër vit me punë të mira në shërbim të banorëve në çdo lagje e fshat të Gjirokastrës”, u shpreh Golemi.
