Socialistët përdorën një interpelancë të kërkuar nga Erion Braçe për të nxjerrë në parlament dy kontrata të firmosura nga Edmond Panariti ish ministri i Bujqësisë, ku të afërm të Klemend Balilit, i akuzuar për trafik ndërkombëtar droge kishin përfituar tokë bujqësore dhe para nga shteti në Përmet. Braçe përmendi gjithashtu edhe tokat në zonën e Lunxhërisë, ku sipas tij shoqëria ‘SHBB Mai’ ka përfituar miliona euro nga buxheti i shtetit përmes skemave të subvencioneve qeveritare. Braçe tha se kjo shoqëri është e një deputeti këtu në sallë, edhe pse ai nuk e përmendi emrin e tij.
‘SHBB Mai’, me vetëm një person të punësuar, tha Erion Braçe, ka marrë nga Ministria e Bujqësisë qindra hektarë toka në Lunxhëri, të cilat i ka lënë djerë, por ndërkohë përfitonte subvencione nga shteti në mënyrë abuzive. Për ‘mafian e tokave’ të Lunxhërisë ka folur në Kuvend të paktën në dy raste të tjera edhe deputeti socialist i Gjirokastrës, Flamur Golemi. Ndonëse ai s’ka përmendur emra, është shprehur se pas kësaj afere qëndrojnë njerëz të veshur me pushtet.
Braçe shkoi edhe më tej kur tha se pas shoqërisë ‘SHBB Mai’ fshihet një deputet këtu në sallë. Por cili është ky deputet i LSI-së, që fshihet pas ‘mafias së tokave’ në Lunxhëri? A është deputet i Gjirokastrës? Nëse është kështu, i bie që pas shoqërisë ‘SHBB Mai’ fshihet Vangjel Tavo. Sidoqoftë LSI nuk mori përsipër të flasë përballë këtyre akuzave të forta ndaj ish-ministrit, Edmond Panariti. Asnjë prej deputetëve të saj nuk doli t’i kundërvihej Erion Braçes.
©ArgjiroLajm.net
