Një 46-vjeçar shqiptar ka humbur jetën në Itali, teksa po tentonte të grabiste një banesë. Ngjarja e rëndë është shënuar në Arezo të Italisë, ndërsa viktima është identifikuar si shtetasi me iniciale A.C. 46-vjeçari së bashku me dy të tjerë, kishin shkuar për të grabitur një banesë në zonën ‘Gorello’.
Sipas raportimeve të mediave italiane, pronari i banesës, kur kuptoi që disa hajdutë kishin hyrë për të vjedhur, qëlloi me armë në ajër, për t’i trembur, duke bërë që ata të arratiseshin.
Megjithatë, arratisja e shqiptarit rezultoi fatale, pasi këmba e 46 vjeçarit shqiptar u ngul në një shtyllë hekuri me majë e vendosur si gardh për t’u mbrojtur nga derrat e egër. Ai u zvarrit për rreth pesëdhjetë metra, por nuk mundi t’i rezistojë plagës së shkaktuar dhe si pasojë humbi jetën.
Incidenti është klasifikuar si aksidental, ndërsa thuhet se nuk kishte asgjë të parregullt në sjelljen e familjes që iu përgjigj sulmit. Policia bëri identifikimin e shqiptarit pasi kishte dokumentet me vete. Ai ishte banues në Lacio dhe me precedentë të mëparshëm penalë. Ndërkohë dy bashkëpunëtorët e tjerë janë ende në arrati dhe po kërkohen nga policia.
