Vrasja e të burgosurit Antonis Papadatos pasditen e djeshme brenda Burgut të Domokos ka ngritur pikëpyetje serioze mbi protokollet e sigurisë në një nga institucionet që konsiderohet ndër më të sigurtat në Greqia.
Hetimi po zhvillohet nga Njësia e Hetimit të Vrasjeve e Drejtorisë së Krimit të Organizuar ndërsa autoritetet po përpiqen të zbardhin se si një armë zjarri arriti të futej brenda ambienteve të burgut dhe si u gjendën disa të burgosur të rrezikshëm në të njëjtin hapësirë me shefin e rojeve. Sipas informacioneve nga agjencia Athens-Macedonian News Agency, Papadatos i dënuar me burgim të përjetshëm për vrasjen e një biznesmeni në Zakynthos, hyri në qelinë e burgut i armatosur me pistoletë me qëllim që të sulmonte shefin e burgut.
Në të njëjtën dhomë ndodheshin edhe dy të burgosur të tjerë, një shtetas bullgar i dënuar me burgim të përjetshëm për vrasjen e biznesmenit Yannis Makris në vitin 2018 në Voula si dhe shqiptari Alket Rizai, i njohur për arratisjen me helikopter nga Burgu i Korydallos, të organizuar nga Vasilis Paleokostas. Sipas pretendimeve të tyre i dënuari bullgar i është sulur Papadatose i ka marrë armën dhe e ka qëlluar për vdekje.
Autoritetet po hetojnë se si hyri arma në një burg me siguri të lartë dhe pse të burgosurit ndodheshin në atë dhomë në orën 18:45, kur duhej të ishin në qeli. Po ashtu mister ngelet dhe fakti se si kaloi viktima tre pika kontrolli që hapen vetëm nga rojet dhe pse mungonin kamerat në vendin ku ndodhi vrasja ndonëse korridoret përreth janë të pajisura me sistem vëzhgimi.
Sipas burimeve, shefi i policisë ishte në proces dorëheqjeje me kërkesë të Sekretariatit të Përgjithshëm për Politikën Kundër Krimit për kryerje të papërshtatshme të detyrës, por zëvendësuesi i tij ende nuk ishte emëruar. Çështja po shqyrtohet nga prokuroria e krimit të organizuar, ndërsa në selinë e Policisë Helenike në Katehaki klima raportohet e tensionuar pasi incidenti konsiderohet tregues i një problemi serioz sigurie në sistemin penitenciar.
Ndërkohë ministria ka nisur procedurat për modernizimin e pajisjeve të sigurisë në burgje me një buxhet prej 4 milionë eurosh për pajisje kontrolli dhe mjete elektronike me qëllim parandalimin e futjes së armëve drogës dhe objekteve të ndaluara ndërsa tenderi ndodhet në fazë zhvillimi.
