POLICIA E SHTETIT
Specialistët për Hetimin e Narkotikëve, në vijim të hetimeve të kryera në kuadër të operacionit të koduar “Risku”, kanë shpallur në kërkim një 43-vjeçar nga Tirana, i dyshuar për përfshirje në një rast të tentativës për trafik ndërkombëtar të lëndëve narkotike.
Sipas njoftimit zyrtar, në kërkim është shpallur shtetasi N. S., 43 vjeç, banues në Tiranë, pronari i kamionit ku u sekuestruan rreth 350 kilogramë lëndë narkotike e dyshuar Cannabis Sativa. Dyshohet se ai ka bashkëpunuar me shtetasin E. Q., drejtuesin e kamionit, i cili u arrestua më datë 27.02.2026.
Lënda narkotike ishte e fshehur në kamion dhe, sipas hetimeve paraprake, dyshohet se kishte si destinacion Greqinë. Strukturat e Policisë po vijojnë punën për kapjen e shtetasit të shpallur në kërkim, ndërsa hetimet mbeten të hapura për zbardhjen e plotë të rrjetit të përfshirë në këtë aktivitet kriminal.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
