Javën e shkuar qeveria miratoi një vendim për nisjen e gërmimeve për eshtrat e ushtarëve grekë në vendin tonë dhe ndërtimin e varrezave ku ata do të prehen. Sa i përket qarkut Gjirokastër, aktualisht janë dy varreza të ushtarëve grekë. Një varrezë në Këlcyrë dhe një tjetër në fshatin Bularat të Bashkisë Dropull.
Në qarkun Gjirokastër do të ketë gërmime të tjera për eshtra ushtarësh grekë, si dhe një varrezë të re, ndonëse në vendimin e qeverisë nuk përcaktohet vendi ku do të bëhen gërmimet dhe as vendi ku do të jetë varreza e re. Për zbatimin e këtij vendimi, qeveria ka ngarkuar prefektët e qarqeve ku do të kryhen gërmimet, duke lënë të kuptohet se do të jenë edhe qarqe të tjera veç Gjirokastrës. Është fjala për Vlorën dhe Korçën.
Në Gjirokastër për kërkimet e eshtrave dhe ndërtimin e varrezës së re do të kujdeset prefekti Astrit Aliaj. Ky i fundit, ushtarak karriere për një kohë të gjatë, u emërua prefekt i qarkut Gjirokastër në muajin nëntor. Përvoja e viteve më parë me kërkimin e shtrave të ushtarëve grekë në qarkun Gjirokastër nuk është fort pozitive. Kujtojmë këtu skandalin e Kosinës në Përmet, të denoncuar nga ‘Fiks Fare’, ku kryeheshin zhvarrime eshtrash të banorëve të fshatit, për t’i llogaritur si ushtarë grekë të rënë në vendin tonë gjatë luftës italo-greke.
Mbetet për t’u parë se sa garant do të jetë prefekti Astrit Aliaj, që të mos përsëritet sërish një skenar i tillë në qarkun Gjirokastër. Sigurisht që ai s’mund të luajë rolin e policit, por qeveria ngarkon atë me zbatimin e këtij vendimi.
©ArgjiroLajm.net
