POLICIA E SHTETIT
Specialistët për Hetimin e Krimeve në Komisariatin e Policisë Gjirokastër kanë referuar materialet në Prokurori, ku ka nisur procedimi penal për veprat penale “Shkelja e rregullave të mbrojtjes në punë” dhe “Shpërdorimi i detyrës”, ndaj dy punonjëseve të Shtëpisë së të Moshuarëve në Gjirokastër.
Në kuadër të hetimeve është nisur procedimi penal për shtetaset Doriana Demo, 50 vjeçe, banuese në Gjirokastër, me detyrë drejtoreshë e Shtëpisë së të Moshuarëve dhe Dh. Zh., 52 vjeçe, banuese në Gjirokastër, me detyrë kryekujdestare në këtë institucion.
Sipas policisë, veprimet procedurale u kryen pas hetimeve për ngjarjen e ndodhur më 4 mars 2026 në ambientet e Shtëpisë së të Moshuarëve, ku fillimisht u dyshua se shtetasja Sh. Z., 72 vjeçe, kishte rënë aksidentalisht nga tarraca. E moshuara humbi jetën gjatë transportimit drejt Spitalit të Traumës.
Nga hetimet e kryera rezultoi se 72-vjeçarja është vetëhedhur nga tarraca e institucionit.
Në vijim të veprimeve për këtë rast, policia referoi materialet në Prokurori edhe për shtetasin M. H., 37 vjeç, banues në Gjirokastër, me detyrë infermier në Spitalin Rajonal Gjirokastër, pasi dyshohet se nuk ka njoftuar organet ligjzbatuese për vdekjen e 72-vjeçares, edhe pse kishte dijeni se për rastin kishin nisur hetimet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
