Ballkani ka pësuar humbje si mysafirë ndaj Llapit në stadiumin “Zahir Pajaziti” në Podujevë, me shifrat 2:0, në njërën nga tri ndeshjet e javës së 23-të në Albi Mall Superligë që u zhvilluan këtë të hënë. Ky rezultat ia ka mundësuar Dritës që të qëndrojë në krye të renditjes pas kësaj jave, me 42 pikë, tri më shumë se sa portokallezinjtë, të cilët para kësaj jave e kryesonin renditjen.
Muhamet Hyseni shënoi golin e parë në minutën e 17-të, ndërsa fitore e llapjanëve e vulosi Edon Sadriu në minutën e parë të shtesës pas asistimit të Arbnor Ramadanit. Këto tri pikë janë shumë të rëndësishme për skuadrën e drejtuar nga Tahir Batatina në garën për t’iu shmangur zonës së rrezikshme në tabelë. Tani Llapi ngjitet në vendin e shtatë me 26 pikë. Humbje si mysafire ka pësuar edhe Prishtina në duel me Malishevën në stadiumin “Liman Gegaj”. Në pjesën e parë dallimin e bënë dy penallti, të shënuara nga Etnik Brruti në minutën e 26-të dhe Laurent Xhylani në minutën e 33-të. Prishtina mbeti me një lojtar më pak në fushë nga minuta e 32-të, pasi kapiteni Ardian Limani, u ndëshkua me karton të kuq. Ndërkaq, Laurent Xhylani vulosi rezultatin në minutën e 73’. Me këtë fitore, Malisheva ka barazuar pikët me Prishtinën, e cila renditet e treta me 37 pikë, pesë më pak se lideri Drita, ndërsa Ballkani mban vendin e dytë me 39 pikë.
Ndërkohë, Gjilani fitoi si mysafir ndaj Ferizaj, me rezultat 2:1, me golat e Armend Thaqit, në minutën e 22-të dhe Senad Jaroviq në minutën e 60-të, ndërsa golin e vetëm për Ferizajn e realizoi Ade Oguns, në minutën e 40-të. Kjo fitore e tretë rresht i siguron Gjilanit vendin e pestë me 36 pikë, vetëm një më pak se Prishtina dhe Malisheva, ndërsa Ferizaj vazhdon të luftojë në zonën e mbijetesës me 23 pikë. Të shtunën, Drita e mposhti Prishtinën e Re (3:0), ndërsa të dielën Drenica dhe Dukagjini e mbyllën përballjen e tyre në “Bajram Aliu” pa fitues (2:2).
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
