Një 51-vjeçar i shpallur në kërkim ndërkombëtar është arrestuar nga policia në Këlcyrë, në kuadër të operacionit të koduar “Fugitive”.
Sipas njoftimit zyrtar, në pranga ka rënë shtetasi Fatbardh Çela, i njohur edhe me emrin Gentian Çela, banues në Këlcyrë. Ai ishte dënuar me 10 vite burg nga Gjykata e Veronës për veprën penale të trafikimit të lëndëve narkotike.
Operacioni u zhvillua nga specialistët për Hetimin e Narkotikëve, në bashkëpunim me shërbimet e policisë lokale, pas sigurimit të informacioneve në rrugë operative për vendndodhjen e tij. Falë ndërhyrjes së shpejtë dhe të koordinuar, u bë e mundur kapja dhe arrestimi i tij me qëllim ekstradimin drejt Italisë.
51-vjeçari ishte shpallur në kërkim ndërkombëtar nga Interpol Roma, ndërsa Interpol Tirana, në bashkëpunim me autoritetet italiane, po vijon procedurat për ekstradimin e tij.
