Violeta Braka, një infermiere që u shërbeu me përkushtim për më shumë se 40 vite qytetarëve të Vlorës dhe jo vetëm, fatkeqësisht është ndarë nga jeta në moshën 63 vjeçare, duke lënë në trishtimë familjen dhe kolegët.
Urdhri i Infermierit të Shqipërisë thotë se Violeta është përcjell sot për në banesën e fundit, ndërsa kolegët e vlerësojnë si një mantelbardhe të respektuar nga të gjithë ata që patën fatin të punonin pranë saj.
“Sot përcollëm për në banesën e fundit Violeta Brakën, e lindur në vitin 1963 në Gramsh. Ajo u diplomua në vitin 1981 në Shkollën e Mesme Mjekësore në Vlorë, dega Infermieri, dhe për rreth 40 vite shërbeu me përkushtim, fillimisht në Shërbimin Obstetrik-Gjinekologji të Spitalit Rajonal Vlorë dhe më pas në Poliklinikën Qendrore të qytetit të Vlorës.
Violeta do të kujtohet gjithmonë si një profesioniste e përkushtuar dhe shembullore. Ajo ishte një zë i qetë në momentet më të vështira dhe një kolege e respektuar nga të gjithë ata që patën fatin të punonin pranë saj. Përkushtimi i saj mbetet një shembull i vyer për komunitetin tonë profesional.
Urdhri i Infermierit të Shqipërisë shpreh ngushëllimet më të sinqerta për familjen, miqtë dhe kolegët. U prehsh në paqe, Violeta”, thuhet në njoftimin që ndan Urdhri i Infermierit të Shqipërisë.
