Pas dy humbjeve radhazi në fazën “Final 4”, atmosfera te Vllaznia është rënduar ndjeshëm. Disfata e fundit 1-2 ndaj Egnatias duket se ka lënë pasoja jo vetëm në renditje, por edhe në aspektin psikologjik të skuadrës kuqeblu.
Në kampin shkodran tashmë humori nuk është aspak pozitiv dhe tensioni ndihet qartazi, teksa ëndrra për titullin kampion duket gjithnjë e më larg. Ndeshja ndaj rrogozhinasve nxori në pah një Vllazni nervoze, të paqartë dhe pa qetësinë që e ka karakterizuar në momentet më të mira të sezonit. Kuqeblutë nuk arritën të mbanin nervat nën kontroll në shumë episode të takimit, ndërsa reagimet në fushë lanë të kuptohej se skuadra po vuan jo pak presionin e momentit.
Në disa momente, sjellja e lojtarëve dha sinjale se ekipi mund të ketë hyrë në një fazë dorëzimi psikologjik. Ajo që bie në sy është fakti se nga klubi nuk ka pasur asnjë reagim publik pas humbjeve të fundit. Te 9 herë kampionët e vendit po tentohet që situata të kalohet në qetësi, larg deklaratave dhe polemikave, ndonëse klima brenda ambientit kuqeblu duket larg qetësisë së dëshiruar. Heshtja e drejtuesve dhe stafi t teknik shihet si një përpjekje për të mos e rënduar më tej situatën në prag të ndeshjeve vendimtare.
Megjithatë, realiteti në tabelë dhe paraqitjet në fushë tregojnë qartë se shpresat për titull janë zbehur pothuajse totalisht. Vetëm një mrekulli sportive dhe një kombinim “i çmendur” rezultatesh mund të bëjnë që trofeu të udhëtojë drejt Shkodrës. Në këto kushte, objektivi kryesor i skuadrës duket se mbetet rikthimi i qetësisë dhe shpëtimi i sezonit me një reagim dinjitoz në javën e fundit.
Tashmë mbetet për t’u parë nëse shkodranët do të arrijnë të reagojnë në momentin më delikat të sezonit apo nëse humbjet e fundit kanë lënë pasoja më të thella sesa vetë rezultatet në fushën e lojës. Në Shkodër pritshmëritë kanë qenë gjithmonë të mëdha dhe zhgënjimi aktual duket se është po aq i madh sa edhe shpresat që ekzistonin vetëm pak javë më parë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
