Zguro tregon çfarë i thanë tifozët pas fitores së Luftëtarit me Partizanin

Vangjel Zguro ka qenë një ndër lojtarët më produktivë të Luftëtarit në këtë sezon. 24-vjeçari nga Pogradeci ka zhvilluar paraqitje pozitive me gjirokastritët duke i shtuar forcë dhe grintë ekipit që drejtohet nga trajneri Hasan Lika.  Në një intervistë për “VIPSPORT.AL”, Zguro shprehet se “çelësi” i suksesit të Luftëtarit ka qenë fakti se askush në ekipin bluzi nuk e humbi besimin.
24-vjeçari është gjithashtu i bindur se Luftëtari nuk do e diskutojë mbijetesën dhe se do të kërkojë edhe më shumë se kaq në pjesën e dytë të sezonit.
-Si e përshkruani këtë pjesë të parë të sezonit për Luftëtarin?
-Pak a shumë kemi po të njëjtën ecuri si sezonin e shkuar. Jemi të kënaqur me fitoret që kemi arritur në javët e fundit.
-Në aspektin personal, jeni i kënaqur me veten?
– Pas një dëmtimi që kisha në fillim të sezonit u riktheva edhe më i fortë, por sigurisht që kam nevojë akoma për t’u përmirësuar.
-Luftëtari ka arritur të marrë rezultate pozitive gjatë javëve të fundit. Cili është “çelësi” i suksesit të ringritjes së ekipit?
-Thjesht nuk kishim një lojtar “gol” në javët e para të kampionatit, por ne e dinim që skuadra kishte kualitet dhe që golat nuk do vononin të vinin, ashtu si edhe fitoret. “Çelësi” i suksesit ishte që nuk humbëm asnjëherë besimin.
-Kush ju shijoi më shumë, fitorja ndaj Partizanit apo ndaj Kukësit?
-Ishin të dyja fitore shumë të rëndësishme dhe “shija” ishte e njëjtë.
-Çfarë ju thanë ndonjë batutë në Gjirokastër pas fitores 5-0 kundër Partizanit?
-Na thanë se me 5 golat që shënuam ndaj Partizanit kaluam edhe legjendat e Luftëtarit, Boni, Seiti, Kalluci e Braho me shokë, sepse ata kishin fituar 4-0.
-Për Bregun, Abzajn dhe Rrocën janë disa klube që kanë shprehur dëshirën për merkaton e janarit. Për ju, ka ndonjë ofertë në prag?
-Po, kam disa oferta nga ekipet e tjera të Superligës, por unë jam në kontratë me Luftëtarin edhe për 6 muaj, ndaj jam i fokusuar vetëm te skuadra ime.
-Keni arritur të bëni për vete tifozët e Luftëtarit, duke ditur edhe faktin se kishit luajtur kundër gjirokastritëve me ekipin e Pogradecit…
-Me bëhet qejfi që më respektojnë, pasi unë tashmë luaj për Luftëtarin dhe mundohem të bëj maksimumin çdo ndeshje. Ndaj gjej rastin edhe t’i përshëndes tifozët e Luftëtarit, pasi janë shumë mikpritës.
-Besoni se do të mbijetojë Luftëtari në Superligë?
– Sigurisht që besoj dhe mendoj se do realizohet mbijetesa, madje pretendojmë edhe diçka më lart se kaq në renditje.