Kombëtaret pretendente për triumfin në Kupën e Botës 2026 kanë hyrë në fazën intensive të përgatitjeve, me Argjentinën, Brazilin dhe Anglinë që po zhvillojnë seanca stërvitore dhe ndeshje testuese përpara nisjes së turneut më të madh të futbollit.
Kampionia në fuqi, Argentina, ka zhvilluar stërvitjen e parë zyrtare në Kansas City të Shteteve të Bashkuara. Nën drejtimin e trajnerit Lionel Scaloni, skuadra punoi në aspektin taktik dhe fizik, ndërsa në qendër të vëmendjes ishte edhe kapiteni Lionel Messi. Argjentinasit synojnë të mbrojnë titullin e fituar në Katar dhe të shkruajnë një tjetër kapitull historik në futbollin botëror.
Ndërkohë, përfaqësuesja e Brazil ka mbërritur në Shtetet e Bashkuara me ambicie të mëdha për të rikthyer trofeun më prestigjioz të futbollit pas më shumë se dy dekadash. Ekipi i drejtuar nga trajneri italian Carlo Ancelotti, ka besim te brezi i ri i lojtarëve brazilianë.
Vëmendje të veçantë ka tërhequr rikthimi në skuadër i yllit Neymar. Edhe pse sulmuesi vazhdon të përballet me probleme fizike pas një dëmtimi në pulpë, stafi teknik mbetet optimist për aktivizimin e tij në ndeshjen hapëse kundër Marokut.
Nga ana tjetër, edhe Anglia ka nisur përgatitjet në Florida, ku temperaturat e larta po shërbejnë si test ideal për kushtet që mund të hasen gjatë turneut. Trajneri Thomas Tuchel ka vënë theksin te përgatitja fizike dhe kompaktësia e grupit.
Në seancat stërvitore kanë marrë pjesë emra të rëndësishëm si Harry Kane, Jude Bellingham, Marcus Rashford dhe Anthony Gordon. Mesfushori Jordan Henderson ka theksuar se objektivi i skuadrës është të shfrytëzojë maksimalisht potencialin që ka në përbërje dhe të mbërrijë në Botëror në formën më të mirë të mundshme.
Me favoritët që po bëjnë llogaritë e fundit dhe po testojnë gjendjen e skuadrave, atmosfera e Kupës së Botës po ndihet gjithnjë e më shumë, ndërsa tifozët presin me padurim fillimin e spektaklit më të madh të futbollit botëror.
