Festat e fundvitit janë një motiv më shumë për t’u gjendur pranë njerëzve në nevojë. Kemi parë shpesh të shtrohen dreka festive, të jepen dhurata apo ndihma të ndryshme. Natyrisht që protagonistë të këtij solidariteti janë edhe politikanët apo zyrtarët publikë, të cilët gati-gati bëjnë ‘garë’ në kohë festash se kush të tregohet më zemërgjeri apo ‘babaxhani’. Pa e përjashtuar vokacionin e tyre të brendshëm për të ndihmuar të pamundurit, politikanët dhe zyrtarët publikë i bëjnë më së shumti hatëre apo qoka të tilla për të marrë vëmendje të shtuar në media dhe për t’u afishuar sa më të gjendshëm e të përkushtuar për qytetarët. Sigurisht që ky nuk është ndonjë mëkat i madh apo diçka që s’ndodh jashtë Shqipërisë. ArgjiroLajm.net vëzhgon vizitat e dy ditëve të fundit në shtëpinë e të moshuarve në Gjirokastër.
Fillimisht ishte kryebashkiakja Zamira Rami dhe një ditë më pas deputetët Flamur Golemi e Mirela Kumbaro që festuan me të moshuarit. Vetëm duke parë fotot e të dy vizitave, kuptohet qartë ajo që theksuam në krye të këtij shkrimi. Duket se kryebashkiakja Zamira Rami ia ka shtruar më plot tavolinen të moshuarve, krahasuar me Mirela Kumbaron e Flamur Golemin. Sidoqoftë këta të fundit e kanë ‘kompensuar’ me disa dhurata, të cilat në pamje të parë duken si batanije. Por ka një të përbashkët në të dyja rastet; pijet freskuese me gaz, të cilat për hir të së vërtetës as nuk rekomandohen nga mjekët për të moshuarit.
Le pastaj që nuk është e vështirë të kuptosh se bëhet fjalë për pije freskuese të ‘dorës së dytë’, ato të cilat shiten shumë herë më lirë në treg sepse janë kualitet i ulët. E njëjta gjë është edhe për ushqimet që ka çuar kryebashkiakja Zamira Rami. Janë kryesisht fruta të thata, patatina, biskota, karamele e tek-tuk ndonjë pjatë me mandarina, përfshi dhe një tepsi të vogël me bakllava. Të thuash drekë modeste ndoshta është shumë. Sa për ‘sy e faqe’, mbase është përcaktimi i saktë. As që ka të krahasuar me dreka të tjera të ngjashme që shtrohen për të moshuarit në Tiranë apo gjetkë. Megjithatë përtej fotove që flasin vetë më shumë se çdo fjalë tjetër, fakti që i shkojnë të moshuarve për festa, mbetet një lajm i mirë. Sidomos kur nuk ‘mburreni’ në Facebook.
©ArgjiroLajm.net
