Futbollisti i Luftëtarit Dejvi Bregu është personazhi i vitit 2017 në Gjirokastër. ArgjiroLajm.net mbylli sonte në mbrëmje sondazhin e publikuar dy javë më parë, ku kishim listuar 10 personazhe të ndryshme. Bregu renditet si më i votuari me plot 1632 vota. Në vendin e dytë është aktori i njohur Erdit Asllanaj, i cili ka marrë 1581 vota. Bregu dhe Asllnaj kanë udhëhequr sondazhin si dy më të votuarit nga lexuesit e faqes tonë, që prej ditës së parë kur ne e publikuam. Në vendin e tretë renditet deputeti Flamur Golemi me 526 vota. Në vendin katërt është gazetarja Brikena Metaj me 413 vota, ndërsa i pesti është Shkëlqim Guçe me 401 vota. Lista vijon më tej me personazhet e tjerë.
Sikundër e theksuam që në momentin e publikimit, dëshirojmë ta përmendim sërish, se ky sondazh është një përpjekje modeste e jona, duke marrë shembull nga media të tjera kombëtare dhe ndërkombëtare. Shpresojmë ta kthejmë në një traditë të përvitshme, me qëllimin e vetëm për t’i dhënë pak më shumë vëmendje atyre njerëzve që gjatë një viti kalendarik i kanë dhënë diçka qytetit të Gjirokastrës.
Në total në sondazh kanë marrë pjesë 5 776 votues. Dhe siç ndodh me të gjitha llojet e zgjedhjeve në Shqipëri, as këtu s’kanë munguar tentativat për ta ndryshuar rezultatin në favor të njërit apo tjetrit personazh. Ka pasur 9543 tentativa për të votuar disa herë nga e njëjta IP, duke përdorur scripte apo aplikacione të ndryshme, por natyrisht që këto vota nuk janë përllogatirur në sondazh pasi janë bllokuar automatikisht prej sistemit.
ArgjiroLajm.net falenderon të gjithë ata që morën pjesë në sondazh dhe sigurisht të gjithë lexuesit tanë të përditshëm. Shprehim urimet më të mira për Dejvi Bregun dhe i dëshirojmë suksese në karrierë. Dëshira jonë është që ai të vazhdojë të qëndrojë në Gjirokastër dhe të shënojë gola të tjerë për Luftëtarin. Por sidoqoftë, kudo që të shkojë ai tashmë ka fituar mirënjohjen dhe simpatinë e të gjithë Gjirokastrës dhe jo vetëm. Suksese!
©ArgjiroLajm.net
