Katër vite përkushtim, sfida dhe kujtime u kurorëzuan me mbrëmjen tradicionale të promovimit për maturantët e shkollës së mesme pedagogjike “Pandeli Sotiri”. Pas përfundimit të provimeve të Maturës Shtetërore, ata festuan mbylljen e një kapitulli të rëndësishëm të jetës. “Të rinjtë festuan katër vite të mbushura me sfida, përpjekje dhe ëndrra” , shprehet drejtoresha e shkollës Matilda Gushi
Për mësuesen Anthulla Kiçu, kjo mbrëmje është po aq emocionuese sa edhe për nxënësit. Pas viteve të kaluara së bashku, ata përcjellin një brez të ri, me bindjen se dijet dhe vlerat e fituara në shkollë do t’i shoqërojnë në çdo hap të jetës.
Një urim të veçantë përcolli edhe kryetarja e Bordit të Prindërve, Mirela Çabeli. Në emër të prindërve, ajo falënderoi drejtuesit dhe mësuesit për përkushtimin dhe profesionalizmin e treguar ndër vite. Si shembull të besimit ndaj kësaj shkolle pedagogjike, ajo solli faktin se binjakët e saj i kanë ndjekur të gjitha ciklet e arsimit , nga arsimi fillor, 9-vjeçar e deri në arsimin e mesëm pikërisht në këtë institucion.
Sipas saj, shkolla ka qenë një shtëpi e dytë për shumë familje, ku fëmijët jo vetëm kanë marrë dije, por janë formuar edhe si qytetarë me vlera, përgjegjësi dhe integritet. Ajo vlerësoi gjithashtu rolin e pazëvendësueshëm të mësuesve dhe drejtuesve në krijimin e një mjedisi ku cilësia në mësimdhënie ecën krah për krah me edukimin, respektin dhe bashkëpunimin.
Me emocionet e kësaj mbrëmjeje, maturantët mbyllin një kapitull të rëndësishëm të jetës së tyre. Përpara i presin sfida të reja, por edhe mundësi të reja për të ndërtuar ëndrrat e tyre. Ndërsa kujtimet e shkollës do të mbeten gjithmonë pjesë e rrugëtimit të tyre.
