Ka nisur pelegrinazhi i madh i besimtarëve bektashinj në Malin e Tomorrit, një nga ngjarjet më të rëndësishme fetare dhe tradicionale të kësaj periudhe. Pelegrinazhi do të zhvillohet nga 18 deri më 25 gusht 2026, ndërsa gjatë shtatë ditëve pritet që në Teqenë e Kulmakut dhe në Malin e Tomorrit të mbërrijnë rreth 600 mijë pelegrinë nga Shqipëria, diaspora dhe vende të ndryshme të botës.
Për shkak të numrit të madh të vizitorëve që pritet të udhëtojnë drejt malit, Drejtoria Vendore e Policisë Berat ka hartuar një plan të posaçëm masash për garantimin e rendit dhe sigurisë publike, parandalimin e incidenteve dhe lehtësimin e qarkullimit të mjeteve dhe këmbësorëve.
Në operacion janë angazhuar shërbimet e DVP Berat, Komisariatet e Policisë Berat, Kuçovë dhe Skrapar, Forca e Ndërhyrjes së Shpejtë Fier, Njësia Operacionale për Sigurinë Rrugore, shërbimet zjarrfikëse, Spitali Rajonal Berat, pushteti vendor dhe Kryegjyshata Botërore Bektashiane.
Policia ka përcaktuar edhe itineraret që duhet të ndjekin drejtuesit e mjeteve gjatë ngjitjes dhe zbritjes nga Mali i Tomorrit. Për automjetet që udhëtojnë drejt Teqesë së Kulmakut, itinerari do të jetë Rrethrrotullimi i Kombinatit – Unaza e qytetit – Rrethrrotullimi i Uznovës – Kryqëzimi i Plirëzit – Teqeja e Kulmakut.
Në kthim nga mali, drejtuesit e mjeteve duhet të përdorin itinerarin Teqeja e Kulmakut – Bargullaz – Pronovik – Poliçan – Uznovë – rruga “Antipatrea” – Rreth rrotullimi i Kombinatit.
Ndërkohë, pelegrinët dhe drejtuesit e mjeteve që vijnë nga Çorovoda këshillohen të përdorin aksin Çorovodë – Gjerbës – Teqeja e Kulmakut dhe të njëjtin itinerar në kthim.
Gjatë gjithë periudhës së pelegrinazhit do të ketë kufizime të rëndësishme për qarkullimin. Në disa akse kryesore rrugore, përfshirë Vlashuk–Kuçovë–Berat, Ura e Kuçit–Dimal–Berat, Pobrat–Dimal–Berat, Berat–Mali i Tomorrit, Berat–Çorovodë dhe Çorovodë–Gjerbës–Mali i Tomorrit, nuk do të lejohet qarkullimi i mjeteve të tonazhit të rëndë nga ora 06:00 deri në 24:00, gjatë gjithë ditëve të pelegrinazhit.
Gjithashtu, autobusët, fugonët me më shumë se tetë persona dhe minibusët nuk do të lejohen të qarkullojnë në segmentin Plirëz–Teqeja e Kulmakut–Mali i Tomorrit.
Për shkak të parametrave të rrugës, në segmentin Plirëz–Teqeja e Kulmakut qarkullimi do të zhvillohet në kolonë dhe parakalimet do të jenë të ndaluara. Policia ka kërkuar gjithashtu që drejtuesit e mjeteve të mos ndalojnë apo parkojnë në akset rrugore dhe të respektojnë udhëzimet e punonjësve të Policisë për zonat ku lejohet parkimi.
Pelegrinazhi në Malin e Tomorrit është një traditë e rëndësishme e komunitetit bektashi dhe zhvillohet në nderim të Baba Tomorrit. Besimtarët udhëtojnë drejt Teqesë së Kulmakut për të marrë pjesë në ritet fetare, për t’u lutur për shëndet, paqe dhe mirësi në familjet e tyre, si dhe për të kryer ritualin tradicional të kurbanit.
Gjatë këtyre ditëve, shumë prej pelegrinëve vendosin çadrat e tyre në malin e shenjtë, ndërsa një pjesë e tyre ngjiten edhe drejt majës së Tomorrit, e cila ndodhet në një lartësi prej 2,416 metrash mbi nivelin e detit.
Barinjtë e zonës së Skraparit janë ndër të parët që mbërrijnë në malin e shenjtë, ku ofrojnë për pelegrinët qengjat që përdoren për kurbanin tradicional të festës.
Teqeja e Kulmakut ka hapur dyert prej disa ditësh dhe është përgatitur për pritjen e numrit të madh të vizitorëve. Në zonë janë siguruar hapësira për çadrat, banjat publike, ndriçimi dhe furnizimi me ujë të pijshëm.
Gjatë shtatë ditëve të pelegrinazhit, ritet kryesore fetare zhvillohen në Teqenë e Kulmakut dhe pranë varrit të Abaz Aliut, ku besimtarët mblidhen për lutje dhe për të përmbushur ritualet tradicionale.
Autoritetet u kanë bërë thirrje të gjithë pelegrinëve dhe drejtuesve të mjeteve që të respektojnë masat e vendosura, sinjalistikën dhe udhëzimet e Policisë, me qëllim që pelegrinazhi të zhvillohet në mënyrë sa më të sigurt dhe pa probleme në qarkullim.
