‘Do të vdesim këtu’, çifti i të moshuarve refuzon të largohet nga pallati në rrezik shembje (VIDEO)

Rrëshqitja e tokës po rrezikon shembjen e një pallati 6 katësh në Gjirokastër. Kjo situate prej ditësh është në qendër të vemendjes së institucioneve vendore dhe atyre qendrore. Por një cift të moshuarish nuk pranojnë të largohen nga banesa.   Nikolla dhe Aristulla Hroni, e kanë blerë apartamentin nga Enti i Banesave në vitin 1992. Nikolla 86 vjecar, rrëfen për Report TV, se as ai dhe as e shoqja e tij 88 vjecare, nuk pranojnë të dalin nga shtëpia pasi janë të bindur se pallati nuk paraqet rrezik.
“Ku të venja? Më mirë isha në shtëpinë time se e dinja se nuk kishte rrezik. Nuk do të lëviz nga banesa në asnjë mënyrë”, thotë Nikolla Hroni banor i pallatit.
Edhe e shoqja e tij Aristulla Hroni 88 vjeçe, shprehet se nuk do të lëvizë nga banesa edhe sikur të vijë policia.
“Nuk do dal këtej. Dua të vdes këtu edhe po më erdhi vdekja. Skam ku të shkoj tjetër veçse të qëndroj këtu me burrin tim. Nuk kam ndërmend të lëviz edhe sikur policët të vijnë dhe të më heqin zvarrë”, thotë bashkëshortja e Nikolla Hronit, Aristulla Hroni.