Sot kryebashkiakja e Gjirokastrës, Zamira Rami u takua me banorët e pallatit që po rrezikon shembjen, për t’i komunikuar atyre raportin e Shërbimit Gjeologjik. Ndonëse në fund të takimit, pati një moment kur ajo u largua me atë arrogancën tipike që ia njohin të gjithë, nuk mund të mohohet gatishmëria e treguar për të ofruar ndihmë ndaj banorëve.
Institucioni që ajo drejton është gati të marrë përsipër çdo gjë që lejon kuadri ligjor për t’u ofruar ndihmë banorëve. Këtu përfshihet akomodimi i përkohshëm në konviktin e Shkollës Pedagogjike, si dhe pagesa e qirasë nga Bashkia Gjirokastër për ata që refuzojnë të shkojnë në konvikt. Më shumë se kaq ndoshta është tepërt që banorët t’i kërkojnë Zamira Ramit. Ajo nuk mund të mbajë përgjegjësi as për kusuret që ka trashëguar në Bashkinë Gjirokastër nga paraardhësi i saj, i cili e drejtoi atë për 12 vjet.
Nga ana tjetër banorët nuk duhet të vazhdojnë më të bëjnë rolin e fëmijës së prapë, duke mos pranuar asnjë zgjidhje. Ata duhet të zbatojnë vendimin e Bashkisë Gjirokastër për të lënë shtëpitë derisa të zbatohen masat e sigurisë rreth objektit. ‘Heroizma’ para kamerave duke i rënë gjoksit se nuk largohen nga banesat, nuk i shërbejnë askujt dhe aq më tepër vetë banorëve që janë në rrezik. Ata duhet të largohen për të mos rrezikuar jetën dhe më pas të punojnë me Bashkinë Gjirokastër për të gjetur zgjidhjen më të mirë. Çdo vonesë e krijuar prej kokëfortësisë dhe ndoshta ndonjë sherrnaje personale me kryebashkiaken, është veç në dëm të tyre.
©ArgjiroLajm.net