Kanë dalë të tjera detaje lidhur me ngjarjen e rëndë të ndodhur sot në Tiranë, ku një 23-vjeçar qëlloi me armë vajzën 21 vjeçe dhe më pas veten. Sipas informacioneve të reja, Aldison Beluli, 23 vjeç dhe 21-vjeçarja Ariela Murati, e cila humbi jetën për shkak të plagëve të marra, ishin bashkëfshatarë nga Zharrëza e Fierit, dhe kishin mbaruar të dy studimet në gjimnazin ‘Sotir Kapo’ në këtë fshat.
Që në gjimnaz, i riu kishte kërkuar një lidhje me vajzën që e kishte ndjekur edhe në Tiranë. Edhe familjet e dy të rinjve ishin njohur me këtë ndjenjë të njëanshme. Djali madje i kishte vajtur edhe në shtëpi vajzës, por familja e saj nuk ka qenë dakord dhe i kanë kërkuar të heqë dorë nga kjo kërkesë. Edhe vajza e ka refuzuar në vijimësi, por i riu nuk ishte bindur për këtë gjë.
Sipas burimeve, mësohet se familjarët e vajzës i kishin kërkuar më herët 23-vjeçarit që të mos e ngacmonte më vajzën e tyre, pasi ai ishte bërë i bezdisshëm. Madje familja e vajzës i kishte kërkuar të largohej të riut që nuk ndalej në kërkesat e tij. Belulaj nuk kishte precedentë penalë, madje kishte nisur punën si infermier në Tiranë, ku njëkohësisht vazhdonte të ndiqte Arielën këmba-këmbës.
