Komiteti i Koordinimit të Emergjencave Civile me anë të një njoftimi, ka kryer bilancin e deritanishëm të situatës së krijuar prej reshjeve intensive të shiut në vend. Kështu, sipas Emergjencave, intensiteti më i lartë i reshjeve u regjistrua në Kukës, Vlorë e Gjirokastër, ku brenda një kohe shumë të shkurtër niveli i prurjeve të lumit Vjosë në Memaliaj arriti vlerën e 8 metrave nga 1-1,5 që ishte përpara fillimit të reshjeve.
Forcat e Armatosura dhe Policia e Shtetit kanë ndërhyrë përgjatë natës për evakuimin e njerëzve dhe të gjësë së gjallë në qarqet e Fierit, Vlorës Gjirokastrës. Reshjet kanë krijuar probleme edhe në qarqe të tjera të vendit si Kruja, Tirana, Elbasani, Dibra, Lezha dhe Kukësi. Në Zall Bastar të Tiranës janë shpëtuar pasagjerët e një furgoni dhe një veture që kishte mbetur në mes të lumit.
Në lagjen Kodra e Shtufit në Gjirokastër u krye evakuimi i banorëve të një pallati të rrezikuar nga rrëshqitjet e dheut.
Emergjencat njoftojnë se akset kombëtare janë të kalueshme, ndërsa vështirësi janë paraqitur në aksin Tepelenë-Gjirokastër tek liqeni i Viroit dhe tek fusha e Lazaratit. Rrëshqitje dherash, rënie gurësh janë ose dëmtime të pjesshme të rrugës janë shfaqur në aksin Tiranë-Dajt, aksin Mamurras-Ura e Drojës, Krujë-Qafë Shtamë, në Rrapës të Pukës, në segmentin Klos –Bulqizë dhe në disa pika të tjera. Vështirësi serioze janë krijuar në Vanë të Delvinës dhe në aksin Kuç-Vlorë. Një elektriçist ka humbur jetën në Tropojë, ndërsa disa zona kanë mbetur pa energji elektrike.
