Banorët e pallatit 8 katësh në lagjen “Kodra e Shtufit” kanë lënë banesat e tyre pas urdhërit të bashkisë për evakuim të menjëhershëm. 21 familjet e këtij pallati janë strehuar tek të afërmit, ndërkohë që ende janë të paqartë mbi situatën dhe sa kohë do të duhet të qëndrojnë jashtë shtëpisë së tyre. Familjet më të dëmtuara janë ato të kateve të dyta dhe të para, disa prej të cilave janë dëmtuar totalisht pasi janë pushtuar krejtësisht nga balta. Shenjat e para të katastrofës janë dhënë rreth dy muaj më parë.
Burime të ArgjiroLajm.net thonë se ka patur carje të rrugës mbi pallat, por askush nuk e mendoi se situata do të rëndohej dhe nga ana tjetër askush nuk mori ndonjë masë parandaluese, për aq sa ishte e mundur. Ndërtimet pa kriter të kryera ndër vite po japin pasojat e tyre në Gjirokastër që rreth 10 vite më parë përjetoi humbjen e tre jetëve pas shembjes së një pallati pikërisht për këtë arsye. Sot në Gjirokastër janë tre zona të rrezikuara nga rrëshqitjet e dheut, banorët e të cilëve janë evakuuar, ndërsa bashkia e qytetit kërkon delegimin e situatës të konsideruar emergjente, në dorë të qeverisë.
