Mbrëmjen e djeshme në Gjirokastër ishte zv.ministri i Mbrojtjes, Petro Koçi, për të parë nga afër situatën emergjente të krijuar pas përmbytjeve. Koçi zhvilloi një takim të shkurtër me banorët e pallatit në lagjen ‘Kodra e Shtufit’ dhe më pas mori pjesë në mbledhjen e shtabit të emergjencave, të thirrur nga prefekti i qarkut, Astrit Aliaj. Por e gjithë lëvizja e zv.ministrit Koçi në Gjirokastër nuk u njoftua për të gjitha mediat. Të pranishëm gjatë takimit te ‘Kodra e Shtufit’ dhe në mbledhjen e shtabit në Prefekturë, ishin vetëm gazetarë të Televizionit Publik Gjirokastra. Gjithë gazetarët e tjerë, që punojnë për mediat kombëtare, u mbajtën larg kësaj vizite, a thua se ishte sekret shtetëror dhe nuk duhej të ishin të pranishëm fare. Justifikimi i dhënë për shmangie të mediave të tjera ka qenë qesharak, aq sa s’ja vlen as të zihet në gojë për publikun dhe ata që lexojnë këto radhë.
Çështja është e thjeshtë. Në Gjirokastër dhe jo vetëm, ka një takëm drejtuesish të institucioneve publike, që i kanë fobi mediat sepse nuk janë në rresht me pushtetin e radhës siç është Televizioni Publik Gjirokastra dhe kjo jo për faj të drejtuesve apo gazetarëve që punojnë aty, por sepse e tillë është politika që prej TVSH-së. Prandaj në çdo situatë delikate, preferojnë më mirë të thërrasin gazetarët e TV Gjirokastra, të cilët i kanë lehtësisht të kontrollueshëm për shkak të presionit me vendin e punës. Kështu ndodhi edhe një ditë më parë gjatë vizitës së zv.ministrit të Mbrojtjes, Petro Koçi. Për fat të mirë këta njerëz, të kujtdo pushteti qofshin, nuk ia vnënë dot drynin internetit, ndaj asgjë nuk mund të mbetet pa u raportuar, për aq kohë sa është fjala për çështje të interesit publik dhe situata emergjente si kjo që po kalon Gjirokastra. Gazetarët nuk duhen trajtuar si ‘armiq’ dhe s’janë mediat ato që i kanë bërë gjëmën këtij vendi. Politika dhe pushtetarët i kanë bërë e vazhdojnë t’i bëjnë një mijë të zeza Shqipërisë. Edhe maskra urbane në Gjirokastër është për faj të politikës sot e mot, jo të medias.
©ArgjiroLajm.net
