Vetëm pak kohë më parë, biznesmeni i famshëm shqiptar Elton Ilirjani pushtoi titujt e mediave për faktin që pranoi publikisht se ishte gay në televizion. Së fundmi, Ilirjani ka qenë i ftuar në emisionin “Zonë e lirë”, ku ka rrëfyer me detaje historinë e fëmijërisë të tij të vështirë në Tepelenë. Siç tregoi moderatori Arjan Çani, babai i Eltonit ishte i ve me tre fëmijë dhe nëna e tij ishte e divorcuar me po ashtu tre fëmijë kur u martuan së bashku dhe biznesmeni është fëmija i tyre i vetëm së bashku.
“Unë kam pasur fatin që jam rritur në një familje me mendje shumë të hapur. Kuptohet që kur isha i vogël kisha sjellje ndryshe nga çunat e tjerë dhe njerëzit mund ta konsideronin si diçka shumë të keqe, por prindërve të mi nuk u ka interesuar çfarë mendonin të tjerët. Gjyshja ishte njeri shumë i rëndësishëm në jetën time, që më ka bërë mua ky që jam sot. Ajo e kuptoi që unë i kisha qejf kukullat dhe duke qenë që nuk mund t’i blinim, m’i bënte vetë. Ajo më la 40 kukulla deri në momentin që u nda nga jeta.”-rrëfeu biznesmeni i njohur, duke treguar më tej se jashtë shtëpisë, çdo gjë ishte ndryshe.
“Kur shkoja në klasë, të gjithë më shihnin me përbuzje dhe inat, kuptohet, sepse isha fëmijë nga një martesë e dytë. Më linin në fund të rreshtit, nuk më dhanë as shaminë e pionerit dhe shumë mirë bënë që nuk ma dhanë se nuk e doja. Më grisën përparse dhe rrija në fund të rreshtit me përparëse të grisur dhe prekja veten për të ndjerë dashurinë që më jepte prekja e nënës dhe e gjyshes. Kanë qenë momente shumë të vështira, por që më bënë shumë të fortë.”-u shpreh Ilirjani, duke treguar më tej se familja e tij jetonte në një shtëpi me dy familje të tjera rome.
Sakaq ai ka treguar se drama e vërtetë ka ndodhur në klasën e parë, në ditën e parë të shkollës, kur mësuesja e kishte dhunuar. “Ka qenë e vetmja goditje, e para dhe e fundit që kam marrë në jetën time. Ka qenë dita e parë e shkollës. Mësuesja na dha një detyrë që të vizatonim vija të pjerrëta. Ndërkohë që klasa nuk arrinte të bënte dot dy vija, unë mbusha gjithë faqen dhe përfundova me fletore të grisur, një pëllëmbë dhe shkulje flokësh.”-tregoi biznesmeni i njohur në studion e emisionit. Por sot gjithçka ka ndryshuar për të, pasi është shndërruar në një prej biznesmenëve më të suksesshëm shqiptarë, që numëron jo pak, por 7 milionë euro.
