Pasi qeveria e refuzoi kërkesën e Zamira Ramit për të shpallur gjendjen e pjesshme të emergjencës në Bashkinë Gjirokastër, kryebashkiakja po vepron me planin B. Sot në mbledhjen e Këshillit Bashkiak, përfaqësuesit e PD-së dhe LSI-së, u bënë bashkë për një peticion drejtuar qeverisë për të miratuar atë që Zamira Rami kërkoi zyrtarisht me shkresë pak pas emergjencës së krijuar në lagjen ‘Kodra e Shtufit’. Por në kushtet kur kjo kërkesë e koalicionit të ri PD-LSI nuk gjeti mbështetjen e këshilltarëve të PS-së, kryebashkiakja e ka marrë vetë fjalën përpara këshilltarëve. ‘Shpërthimi’ dhe ‘dorëzimi’ i saj përballë kësaj emergjence ishte i dukshëm teksa ajo po fliste përballë këshilltarëve dhe medias.
Me ton të lartë zëri dhe e lodhur nga kjo situatë, Zamira Rami deklaroi se është e pafuqishme për të përballuar emergjencën. Në fjalën e saj viheshin re dy elementë. E para ajo nuk e përqëndroi problemin vetëm tek ‘Kodra e Shtufit’, por e zgjeroi edhe më tej duke përfshirë Zhulatin i cili s’ka komunikim me rrugë që prej fillimit të muajit dhjetor. E dyta, Zamira Rami zhvlerësoi plotësisht rolin e prefektit Astrit Aliaj dhe shtabit të emergjencave që ai drejton në Prefekturë, teksa u shpreh se njerëzit nuk kënaqen me ato që thotë prefekti. Por gjasat janë që as kësaj radhe qeveria të mos i përgjigjet ‘rebelimit’ të këshilltarëve të PD-së dhe LSI-së me ‘bekimin’ e Zamira Ramit, duke ia lënë përgjegjësinë totalisht Bashkisë Gjirokastër. Sidoqoftë mbetet për t’u parë. Nga ana tjetër në një situatë të tillë, të penalizuar janë vetëm ato familje që përballen me situatën kritike. Shihni në videon më poshtë atë çfarë tha sot Zamira Rami.
©ArgjiroLajm.net
