Kreu i Policisë së Shtetit Ardi Veliu ka prezantuar këtë të premte përpara uniformave të Tiranës drejtuesin e tyre të ri Kastriot Skënderaj. Kastriot Skënderaj mban titullin e Drejtuesit të Parë dhe vjen nga një karrierë e gjatë policore në rolin e drejtuesit. Së fundmi ai mbante postin e Drejtorit të Drejtorisë së Kufirit Tiranë. Kujtojmë se ditën e djeshme në Policinë e Shtetit u prezantuan gjithashtu dhe drejtuesit e rinj nëpër qarqe të kupolës së policisë. Më poshtë njoftimi për zgjedhjen e Skënderajt në krye të policisë së Tiranës
Drejtori i Pergjithshëm i Policisë së Shtetit Ardi Veliu ka prezantuar Kastriot Skënderaj, në detyrën e Drejtorit të Policisë Vendore Tiranë. Veliu ka vlerësuar integritetin dhe profesionalizmin e treguar nga Skënderaj në detyrat e mëparshme dhe shprehu bindjen se edhe në këtë detyrë shumë të rëndësishme do ta përmbushë me sukses. Drejtori i Pergjithshëm falenderoi efektivët e Drejtorisë Vendore të Policisë Tiranë për përkushtimin që kanë treguar gjatë kohës që ai ishte në krye të Policise Vendore dhe u kerkoi që rezultatet e arritura t’i rritin më tej, nën drejtimin e zotit Skënderaj. Drejtori i sapo emëruar ka falenderuar Drejtorin e Pergjithshëm për besimin dhe mbështetjen, duke e siguruar se së bashku me ekipin do permbushin objektivat e reja që tashmë ka Policia e Shtetit. Drejtues i Parë Kastriot Skënderaj vjen nga një karrierë e gjatë policore në rolin drejtues, ku së fundi mbante postin e Drejtorit të Drejtorisë Vendore të Kufirit Tiranë. Ka qenë gjithashtu edhe drejtor i Policisë Gjirokastër në vitin 2015 kur u bë ndërhyrja në të cilën mbeti i vrarë edhe efektivi i RENEA-s, Ibrahim Basha.
