Një nga situatat më emergjente në Shqipëri është rrëshkitja e kodrës së shtufit në lagjen “18 shtatori” në Gjirokastër. Disa pallate shumëkatëshe rrezikojnë të shemben, ndërsa prej javësh, dhjetëra familje në këto pallate jetojnë me frikë. Pas ngjarjes, strukturat shtetërore u ngritën në këmbë për heqjen e baltës, por rreziku është ende i lartë.
Megjithëse kanë kaluar disa javë nga ngjarja në fjalë, bashkia, prefektura, emergjencat civile, apo Ministria e Mbrojtjes, ende nuk kanë nxjerr shkaqet e këtij aksidenti. Punonjësit e këtyre institucioneve, që marrin pagat nga taksat tona, nuk kanë mundur që të gjejnë përgjegjësin. Por së fundmi, Bashkia e Gjirokastrës, ka hapur një tender, me vlerë 6.5 milionë lekë të vjetra me objekt “shpime gjeologjike, analiza laboratorike për objektin ‘rrëshqitja në Qytetin Gjirokastër, Kodra e Shtufit’”. Do të kryhen punime gjeologjike që do të kryhen në lagjen “18 Shtatori”, në zonën ku ka ndodhur rrëshqitja mbi pallatin 8 katësh.
Tpz.al ka siguruar dokumentet e këtij tenderi, ku thuhet se në zbatim të rekomandimeve të dhëna nga studimi emergjent gjeologo – inxhinierik i fenomenit të rrëshqitjes masive të ndodhur në lagjen “18 Shtatori”, hartohet kjo detyrë projektimi për punimet gjeologjike që do të kryhen në zonën ku ka ndodhur rrëshqitja mbi pallatin 8 katësh. Mësohet se do të kryhen 4 pika shpimi, brënda zonës së rrëshqitjes, me një metrazh të përgjithshëm 80 ml. Shpimet do të jenë teknike, me rrotullim, dhe me marje kampioni në masën mbi 90%. Në kampionaturën e nxjerrë nga punimet e sondës do të merret prova me strukturë të prishur dhe me strukturë të paprishur, me qëllim kryerjen e analizave laboratorike të nevojshme. Mësohet se punimet e kryera do të azhornohen nga një topograf, dhe ato do të jenë me kuota relative. Studimi gjeologjik do të realizohet nga specialistë të Shërbimit Gjeologjik Shqiptar.
Pra, mesa duket shteti ynë nuk ka kapacitete për të bërë asgjë dhe mënyra më e thjeshtë për të kryer një punë publike është nëpërmjet tenderave për kompanitë private./TPZ.AL/E.H./
