Gjatë ditës së sotme PD Gjirokastër reagoi përmes një deklarate, ku shprehte shqetësimin për zhvendosjen e arkivit të Gjirokastrës drejt Lushnjes. ArgjiroLajm.net u interesua më tej për këtë çështje për të mësuar si është e vërteta. Burime zyrtare nga Drejtoria Qëndrore e Arkivit thanë se reforma në arkivat vendore është një domosdoshmëri për të ndaluar shkatërimin e mëtejshëm të memories kolektive kombëtare. Për këtë, është parashikuar që ‘dokumentet me rëndësi historike kombëtare të grupohen në katër vendruajtje brenda standardeve në të gjithë Shqipërinë, për t’u ruajtur më mirë, për t’u menaxhuar dhe administruar sipas standardeve arkivore kombëtare dhe për t’u dixhitalizuar me ritëm të shpejtë”.
Më tej mësohet se nuk bëhet fjalë për ikje të arkivit nga Gjirokastra. Politikat arkivore, trajnimet, tërheqja e dokumentacionit, kontrolli dhe inspektimi do të kryhen nga inspektori rajonal i arkivave që do të jetë në Gjirokastër! Në Lushnje do të ndërtohet një prej katër vendruajtjeve me standarde dhe kushte bashkëkohore për ruajtjen e arkivave. Cdo qytetar i Gjirokastrës, Përmetit apo Tepelenës që kërkon dokumente, do t’i bëjë kërkesat përmes Postës Shqiptare. Plotëson formularin përkatës dhe përgjigjja i vjen sërish me postë brenda një afati të përcaktuar. Kjo shkurton shpenzimet për njerëzit dhe përmirëson shërbimin.
Sa i përket studiuesve që duan të shfrytëzojnë arkivat, pritet që së shpejti i gjithë informacioni të jetë i aksesueshëm online, sikundër ndodh në arkivat e vendeve të tjera.
©ArgjiroLajm.net
