Ndeshja e sotme mes Skënderbeut dhe Luftëtarit ishte shembulli konkret se si gjyqtarët mund të shkatërrojnë një duel futbolli të cilin tifozët e prisnin prej shumë kohësh pasi përballë vihej ekipi kryesues i Superiores me ekipin që luan futbollin më argëtues. Gjyqtari Emirjon Sino dhe asistenti i tij, Ilir Tartaraj bënë gabime të njëpasnjëshme dhe pa dashur të paragjykojmë askënd, gabimet e rëndësishme shkonin të gjitha kundër skuadrës gjirokastrite, duke e bërë gjykimin e sotëm thuajse të njëanshëm.
Që në fillim Sino toleron Alitin për tërheqje nga fanella, kur rregullorja e thotë qartë që duhej ta ndëshkonte me karton të verdhë. Aliti bëri disa ndërhyrje më pas, derisa u ndëshkua me të verdhë nga kryesori, por loja e tij mund të ndikohej nga i verdhi i shpejtë, ose më keq, mund të përfundonte ndeshjen me të kuq. Gafa më e rëndë është ajo e penalltisë së akorduar për Skënderbeun. Soue hidhet para kontaktit me portierin, por Sino jo vetëm që nuk kthen vendimin pas revoltës gjirokastrite, por edhe ndëshkon me të verdhë Abazajn për protestat e tij. Rezultati shkon në 2-0 dhe për Luftëtarin bëhet gjithçka më e vështirë.
