Në administratën e burgjeve, ku gjatë mandatit të parë të Ramës ishin strehuar kryesisht militantë të LSI-së, pritet të nisë fushata e spastrimeve. Të parët në radhë janë punonjësit e evidentuar me rekorde kriminale, rreth 130 të tillë në të gjithë burgjet e vendit. Prej tyre ka edhe në administratën e burgut të Bënçës në Tepelenë.
Me një postim në Facebook, Ministrja e Drejtësisë, Etilda Gjonaj shkruan se ky është hapi i parë që është marrë për pastrimin e plotë të radhëve të punonjësve të burgjeve nga elementë të inkriminuar. Gjonaj rikonfirmoi shifrën 130 punonjës të administratës me rekorde penale, të cilët do të largohen, por nuk saktësoi se si është shpërndarja e tyre sipas burgjeve të vendit.
