64-vjeçari Sali Ngjelina i aksidentuar sot pasdite pranë Urës së Kardhiqit ndodhet në gjendje të rëndë shëndetësore. Burime të ArgjiroLajm.net thonë se gjatë mbrëmjes ai është dërguar me autoambulancë drejt kryeqytetit për ndihmë mjekësore më të specializuar. Mësohet se Ngjelina do të marrë trajtim mjekësor në Spitalin e Traumës. Ai ishte duke drejtuar zetorin, i cili u përplas nga një makinë tip ‘Ëolsvagen’. Për fat të keq në këtë aksident ndërroi jetë djali i tij 25-vjeçar, Klajdi Ngjelina, si dhe u plagos bashkëshortja H.Ngjelina, 58 vjeç. Kjo e fundit ndodhet jashtë rrezikut për jetën. Familja nga Picari kishte dalë familjarisht me zetorin e tyre për të blerë ushqime në dyqanet e zonës, por udhëtimi i tyre i fundit rezultoi tragjik. Dyshohet se shkak i aksidentit ka qenë lëvizja e gabuar e Sali Ngjelinës, i cili i ndërpreu rrugën me zetor makinës që drejtohej nga 21-vjeçari E.Gj nga Kavaja.
©ArgjiroLajm.net
