Sherri në Kuvend, flet deputeti i Gjirokastrës: Opozitë e miellit dhe çizmeve, s’kanë alternativë

Deputeti i Partisë Socialiste i qarkut të Gjirokastrës, Flamur Golemi ka komentuar aktualitetin dhe zhvillimet politike në vend. Gjatë një prononcimi për gazetën ‘Sot’, Golemi është ndalur tek protesta e opozitës, e cila ditën e enjte shkaktoi kaos dhe dhunë në Parlament. Ai thotë se opozita e sotme nuk ka asnjë alternativë, prandaj dhe sipas tij, tenton të pengojë punimet në Kuvend. 
“Shfaqja e djeshme në Kuvend ishte në serinë e shumë të tjerave që opozita jep për shqiptarët sa herë mblidhemi në seancë. Për fat të keq, nuk është kjo ajo që pritet nga një opozitë. PD dhe LSI nuk janë votuar të qëllojnë me miell, vezë apo çizme. Duhet të bëjnë oponencën ndaj qeverisë brenda gjithë kuadrit demokratik e kushtetues, si dhe të shfaqin një alternativë të re për qytetarët. Por fatkeqësisht kjo opozitë nuk ka asnjë alternativë dhe asnjë kauzë, prandaj tenton të mbjellë pasiguri dhe të pengojë punimet në Kuvend. Është për të ardhur keq kur skena si ato që pamë të enjten në Kuvend, ndodhin teksa Shqipëria po pret një lajm të rëndësishëm nga Brukseli; hapjen e negociatave”, deklaroi deputeti socialist.