Pas lajmit të publikuar në ArgjiroLajm.net se nga të dhënat e deritanishme, po diskutohet mes dy partive opozitare, që Bashkia Libohovë t’i lihet një kandidati të LSI-së në zgjedhjet e ardhshme lokale, ka reaguar PD Libohovë. Përmes një deklarate në Facebook, PD e quan këtë lajm gënjeshtër, ndërsa portalit i referohet si ‘portali i rilindjes’.
Në fakt ne në artikull nuk i kemi vënë vulën duke thënë që kandidati do të jetë i LSI-së, por nga projeksionet e para dhe bisedimet mes palëve, ka gjasa që në Bashkinë Libohovë opozita të hyjë me një kandidat të LSI-së. Sidoqoftë, kemi theksuar, se këtu e një vit më vonë do të rrjedhin shumë ujëra. Prandaj PD Libohovë le të ruajë qetësinë dhe të bindë njerëzit përse duhet ta votojnë, pasi s’e ka me portalet betejën. Nuk i përcaktojmë ne kandidatët. Po të ishte në dorën tonë, as PS, as LSI, as PD nuk meritojnë të qeverisin më, jo Libohovën, po as Shqipërinë. Të trija palët, ngaqë kanë në radhët e tyre më shumë hajdutë dhe injorantë, i kanë bërë gjëmën Shqipërisë në këto 27 vite.
Sa për etiketën ‘portali rilindjes’, është një refren bajat i thënë e stërthënë nga njerëz që shpifjen dhe përbaltjen e kanë si oksigjeni që thithin përditë. Është po ai takëm njerëzish haluçinantë që thonë se ‘tre drejtorë të rilindjes paguajnë tek ne nga 1 mijë euro çdo muaj’. Sa për fjalën ‘hashash’, me siguri që PD Libohovë është frymëzuar nga lajthitjet e prefektit, i cili disa javë më parë na shpalli neve si media palë me bandat e drogës.
PD Libohovë mbase është mirë t’i sqarojë elektoratit të vet; Roland Bejkos; Tritan Shehut apo ndoshta edhe Lulzim Bashës, si i ‘trafikoi’ votat e strukturave të saj në 25 qershor për llogari të PS-së dhe t’i garantoni se nuk do ta bëni më këtë pazar në zgjedhjet e ardhshme. Madje as në kushtet kur opozita mund të përfaqësohet në këtë bashki me një kandidat nga radhët e LSI-së.
©ArgjiroLajm.net
