Denoncimi i publik i një vajze minorene në Ora News se e ka ngacmuar seksualisht mësuesi ka tronditur opinionin publik. Xhaxha i 11-vjeçares nga fshati i Kalasë ka thënë për Ora News se nëse nuk vepron ligji për mësuesin Neshat Tepelena, do të bëjnë vetëgjyqësi. Ndërsa kryeplaku i fshatit, Ferdin Xhaferri është shprehur se Tepelena është përballur me një rast të ngjashëm edhe në vitin 2003. Sipas Xhaferrit çështja në atë kohë u mbyll vetëm me një vërejtje me shkrim.
Ferdin Xhaferri: “Çështja ka shkuar edhe te seksioni i arsimit dhe është protokolluar në nëntor të vitit 2003. Në atë kohë kjo çështja u mbyll me një vërejtje me shkrim për mësuesin Neshat Tepelena. Ai e ka në dosjen e tij të punës vërejtjen me shkrim.” Banorët kanë treguar për Ora News se ai ka ngacmuar seksualisht edhe vajzën e kolegut të tij.
Sipas tyre ngjarja ka ndodhur 2 javë para publikimit të rastit të vajzës 11 vjeçare e fshatit Kalasë. Neshat Tepelena është arrestuar nga policia e Delvinës me akuzën për ngacmim seksual. Skandali dyshohet se ka ndodhur rreth dy muaj më parë në ambientet e Shkollës “Ali Hajdini” në fshatin Kalasë të Delvinës, por u mbajt i fshehur nga familja e nxënëses për shkak të opinionit.
Ata thyen heshtjen të shtunën, dhe vetem pak orë pas denoncimit publik mësuesi u shoqërua për në komisariatin e Policisë së Delvinës. Por sic mëson Ora News 60 vjeçari ka mohuar akuzat në dëshminë e parë në Polici. Ai është shprehur se e ka trajtuar 11 vjecaren si të gjithë nxënësit e tjerë të shkollës ku jepte mësim deri pak muaj më parë.
