Jeta kulturore dhe artistike nëpër rrethe është tejet e vakët. Mungojnë organizimet e ndryshme, mungojnë investimet prandaj dhe shumicën e njerëzve i sheh më shumë nëpër lokale. Përjashtim këtu nuk bën as Tepelena. Ndonëse qyteti e ka pasur një kinema deri në vitin ’90, ajo u rrënua dhe askush më pas nuk u kujtua ta rindërtonte. Së fundi Bashkia Tepelenë e rikonstruktoi ndërtesën, por në vend që ta rivënte në punë si kinema, zgjodhi t’ja jepte një biznesi fason. Natyrisht që biznesi duhet mbështetur, sepse krijon vende pune, ndonëse kur vjen fjala tek industria fason dihet që ka një paragjykim. Në shumë raste konsiderohet edhe si biznes ‘skllavërues’, për shkak të pagesave të ulëta dhe kushteve të këqija të punës. Dikush mund ta relativizojë çështjen dhe të thotë: Njerëzit kanë nevojë për punë, s’duan filma… Por në fakt kultura ka vendin e vet. Ta kthesh kinemanë në kapanone ku qepen këpucë apo veshje, nuk është një lajm i mirë.
©ArgjiroLajm.net
