Zyrat e Punës në të 12 qarqet e vendit, kanë punësuar gjatë muajve janar-prill 7 649 persona të cilët kanë kërkuar punë pranë këtyre zyrave, dhe institucionet i kanë ndërmjetësuar qytetarët me subjektet private. Sa i përket qarkut Gjirokastër, nga zyra e drejtuar prej Edi Peshës, janë punësuar 345 persona. Objektivi i caktuar nga qeveria ka qenë 224 vetë. Pra, dukshëm janë punësuar më tepër sesa i është kërkuar. Realizimi i objektivit në këtë rast është 154%, duke të kujtuar në një farë mënyre edhe realizimet e planeve në kohën e Enver Hoxhës. Kjo do të thotë se Edi Pesha i shpëton shkarkimit si drejtues i Zyrës Rajonale të Punësimit, të paktën për momentin. Kujtojmë se në janar të këtij viti, kryeministri Edi Rama ‘kërcënoi’ drejtuesit e Zyrave të Punës në mbarë vendin se do t’i shkarkonte në rast se nuk përmbushnin objektivat. Rama i qëndron fort idesë së tij se këtu ka punë, por s’ka profesionistë dhe se njerëzit duam më shumë të shkojnë në shtet, duke refuzuar punën në sektorin privat.
© ArgjiroLajm.net
