Nga Brikena Metaj/ Dimri i këtij viti tronditi Gjirokastrën me një sërë rrëshqitje dherash që rrezikuan rreth 50 familje, një pjesë e të cilëve u detyruan të braktisin banesat e tyre. Familja Gërxholli, banesa e të cilëve ndodhet në katin e tretë të pallatit tetëkatësh në lagjen “Kodra e Shtufit”, jeton ende në një shtëpi me qira, ndërsa ambientet e brendshme të shtëpisë së tyre janë ende të zaptuara nga balta. Familjarët kanë zhvendosur vetë një pjesë të baltës, por sasia e madhe e saj e bën të pamundur pastrimin total të shtëpisë.
Suzana pohon se tashmë i kanë humbur shpresat se banesa e tyre do të rikthehet në gjendjen e mëparshme, ndërkohë që mbeten ende në pritje dhe pa asnjë informacion se si do jetë fati i tyre. Pas debateve dhe përplasjeve institucionale midis bashkisë dhe prefekturës për kompetencat e trajtimit të situatës së krijuar, hapi i vetëm i ndërmarrë në zgjidhjen e kësaj problematike është marrja e mostrave të tokës dhe nisja e punës për hartimin e një plan – projekti që synon stabilizimin e zonave të rrëshqitjeve. Por deri në këto momente situata në terren duket e pandryshuar, ndërsa banorët i tremben harresës dhe pasojave.
