Kryeministri Edi Rama vjen nesër në Gjirokastër ku do të zhvillojë një dëgjesë publike në kuadër të turit të llogaridhënies së qeverisë, takime të ndryshme në Libohovë, Dropull, Tepelenë e Përmet, si dhe mbledhje qeverie. Sipas njoftimit, takimi më i madh do të jetë të hënën pasdite në Pallatin e Sporti të Gjirokastrës.
Por nëse për qytetarët e zakonshëm takime të tilla shihen si një mundësi e shkëlqyer për të komunikuar direkt me kreun e qeverisë dhe për t’i qarë hallin, e kundërta ndodh me drejtuesit e institucioneve. Këto takime për ta janë një siklet më vete, pasi i druhen ndonjë ankese prej qytetarëve live para kamerave dhe në sytë e kryeministrit. Kemi parë në shumë raste se si Rama ka ‘kërcënuar’ publikisht drejtorë të ndryshëm, për të cilët janë ankuar qytetarët, si dhe u ka dhënë ultimatume se nëse nuk i japin zgjidhje problemeve të njerëzve të dorëzojnë menjëherë detyrën.
Për t’i shpëtuar këtij ‘gjyqi’ publik dhe për të shmangur ndonjë ultimatum të mundshëm prej kryeministrit, drejtuesit e institucioneve rajonale së paku duhet të rishikojnë gjithë praktikën e tyre të punës deri më tani, të identifikojnë ndonjë rast problemtatik që mund të kenë patur dhe të jenë në gjendje të japin përgjigje para kreut të qeverisë. Nëse shkojnë me ‘duar në xhepa’, nuk përjashtohet mundësia që të gjenden para ndonjë të papriture. Të mos harrojmë se burokracia, korrupsioni dhe shërbimi i keq në administratën publike është ende në nivele të larta. Dhe këtu padyshim bën pjesë edhe Gjirokastra.
©ArgjiroLajm.net
