I vënë në qendër të akuzave të opozitës, pas publikimit të disa përgjimeve për pazare droge ku pretendohej se ishte i vëllai i tij, ministri i Brendshëm Fatmir Xhafaj nuk udhëtoi në Gjirokastër me kryeministrin Edi Rama gjatë vizitës së tij dy ditore. Por me sa duket ia kishte lënë ‘vendin’ zv.ministres së Brendshme, Rovena Voda, e cila zhvilloi një takim me drejtuesit vendorë të Policisë së Gjirokastrës. Ajo vlerësoi përfundimin e fazës së parë të procesit të Vettingut duke deklaruar se ai u zhvillua pikërisht në kohën e duhur.
“Është e vërtetë që Qeveria shqiptare ndërmori reformën e madhe, atë në drejtësi, që lidhet në fakt me dy organe të pavarura, por të lidhura me punën e Policisë. Policia e Shtetit është në vijën e parë, është ajo që ndeshet e para me krimin. Kështu që detyrimisht ka lidhje patjetër me Prokurorinë, edhe me Gjykatën”, theksoi Voda.
Zv.ministrja zhvilloi edhe një tkaim në pikën e kalimit kufitar të Kakavijës, për të inspektuar masat policore kundër trafiqeve të paligjshme, si dhe inspektoi ambientet e pritjes së emigrantëve nga vendet e treta.
© ArgjiroLajm.net
