Fatih Jusufi është një ndër lojtarët që dje u paraqitën në stërvitje me Luftëtarin, nën drejtimin e trajnerit të ri Millosh Kostiç. Ai është në grupin e lojtarëve që do të provohen nga trajneri slloven gjatë këtyre ditëve, por në Maqedoni e quajnë fakt të kryer kalimin e Jusufit tek ekipi gjirokastrite.
Për sulmuesin 19-vjeçar, i cili vjen nga Shkupi, firma në kontratën e re do të hidhet shumë shpejt, siç raporton “infOSport.mk”. E ka nisur karrierën te Vardari, kurse para Shkupit ka luajtur edhe me Rabotniçkin. Madje, Jusufi është provuar edhe te skuadra e njohur turke e Bursasporit, por dokumentacioni jo i plotë e pengoi për të shkuar aty.
Bëhet fjalë për një lojtar shumë të talentuar, që mund të zëvendësojë më së miri Bregun ose Abazajn, dy lojtarët e larguar nga gjirokastritët. Në Maqedoni bëjnë me dije se Luftëtari dhe kampionati shqiptar kanë përfituar një futbollist shumë të talentuar.
