Djegia e gomave në zonën industriale të Gjirokastrës vazhdon pa u shqetësuar. Rituali kriminal me pasoja të rënda në mjedis dhe shëndetin e njerëzve përsëritet gati çdo fundjavë. Shtullunga të dendura tymi kancerogjen mbulojnë qytetin dhe askush nuk merr masat. Fotot që shihni janë shkrepur mëngjesin e sotëm. Krahas imazheve të rënda, ironia qëndron edhe në përgjigjen e policisë Gjirokastër pas denoncimit të një qytetari në numrin 129. Përgjigjja që i është dhënë nga salla operative ishte kjo: “Shkoni tek ata të mjedisit, nuk merremi ne….”
Derisa institucionet shtetërore të sqarojnë ndarjen e kompetencave, qytetarët janë të detyruar të thithin tymin kancerogjen, i emetuar nga djegia e gomave prej subjekteve private, të cilat duan të përftojnë telin prej bakri që ato kanë brenda. Për të mos folur pastaj për çështjen estetike që është një aspekt tjetër dhe që nuk duhet neglizhuar, aq më tepër kur flasim për një qytet turistik si Gjirokastra.
©ArgjiroLajm.net
