Ju kujtohet kampi i gjigand i kosovarëve në Kavajë? Ja se si e përshkruan në këtë fotografi të TemA, njëri prej vullnetarëve të Kryqit të Kuq Italian:
“Nuk e di nëse ju kujtohet, por i vetmi operacion humanitar i realizuar nga ana jonë si italianë për së mbari ka qenë ai i “Ndihmojmë Ata në Shtëpinë e tyre”.
Një projekt i Qeverisë së atëhershme italiane D’Alema (1999), në kuadrin e Misionit “Arcobaleno”.
Nëpërmjet ndërtimit të shumë kampeve të refugjatëve në të gjithë Shqipërinë (në foto njëri prej tyre ai i Kavajës, i ndërtuar për të pritur 7.400 refugjatë) u bllokua emigracioni i sigurt i kosovarëve drejt Italisë, dhe kjo falë një pune mjaft të madhe dhe të përkryer për sa i përket asistencës humanitare pēr një popullsi që i kishte shpëtuar terrorit të luftës me Serbinë. Foto vjen në një kohë kur në Shqipëri ka shpërthyer një histeri, nga ndërtimi i mundshëm i ndonjë kampi për të pritur refugjatët sirianë, të cilët kërkojnë t’i shpëtojnë luftës. Nëse Shqipëria zgjidhet si vend pritës për refugjatët Gjirokastra mbetet ndër zonat kryesore ku do të vendoset kampi.
