Pas nisjes së punës për Bypassin e Tepelenës, do të hapet kantieri për rrugën Kardhiq-Delvinë. Kështu thotë deputeti socialist i Gjirokastrës, Flamur Golemi, i cili ishte sot në ceremoni me kryeministrin Rama.
“Sot nisi puna për një vepër infrastrukturore të rëndësishme në qarkun Gjirokastër dhe gjithë jugun e vendit; Bypass-i i Tepelenës. Ky projekt transformues do të ketë një impakt të jashtëzakonshëm në zhvillimin e mëtejshëm të qytetit dhe qarkut tonë. Lehtëson fluksin e trafikut, rrit sigurinë në rrugë, lidh shpejt jo vetëm qendrat urbane të qarkut, por edhe 13 fshatrat që janë pjesë e programit ‘100 Fshatrat’. Kantieri që inaguruam sot në Tepelenë me kryeministrin Rama dhe ministrat Gjiknuri e Kumbaro, do të pasohet nga kantieri tjetër i rrugës Kardhiq-Delvinë. Nuk janë thjesht premtime elektorale të mbajtura, por një vendosmëri dhe vizion i qartë, për t’i dhënë jetë zhvillimit afatgjatë të qarkut Gjirokastër dhe mbarë vendit”, shkruan Golemi përmes një mesazhi të postuar në faqen e tij në Facebook.
© ArgjiroLajm.net
