9 muaj nga përfundimi i mandatit të të zgjedhurve në pushtetin vendor, kreu i PD Gjirokastër, Roland Bejko, ngre shqetësimin e mungesës së qytetarëve në mbledhjet e Këshillit Bashkiak, si dhe publikimin paraprakisht të rendit të ditës dhe vendimeve që miratohen më pas. Ndonëse është e habitshme përse Bejko u kujtua për këtë shqetësim tre vjet më vonë, por sidoqoftë më mirë vonë sesa kurrë, ajo që bën përshtypje tjetër është fakti se Partia Demokratike në Gjirokastër ka njeriun e vet sekretar të Këshillit Bashkiak.
Pikërisht Spartak Drasën, të zgjedhur në muajin maj të këtij viti. Sipas ligjit të pushtetit vendor, neni 57, gërma (ç), është sekretari i Këshillit Bashkiak që njofton paraprakisht rendin e ditës për mbledhjet dhe publikimin e vendimeve të miratuara.
Thënë këto, ankesa e Bejkos në këtë rast duhet të adresohet tek Spartak Drasa. Sa i përket Bashkisë Gjirokastër, në shumicën e rasteve njoftimi i mbledhjeve dhe i rendit të ditës është bërë në faqen në Faceobook dhe në faqen Web të bashkisë. Por kreu i PD Gjirokastër thotë se edhe pse kanë kaluar tre vjet, Zamira Rami s’e ka caktuar akoma koordinatorin e transparencës.
“Edhe pse jemi ne vitin e fundit te mandatit qeverises se Bashkise Gjirokaster ende nuk e dime nese ky institucion e ka caktuar apo jo koordinatorin per transparencen dhe nese ka nje program te miratuar per kete qellim sic e kerkon ligji”, shkruan Bejko duke u zotuar se këtej e në vijim do ai vetë si këshilltar do të përpiqet të bëjë transparencën, duke publikuar rendin e ditës dhe vendimet miraton Këshilli Bashkiak Gjirokastër.
© ArgjiroLajm.net
