Në Gjirokastër po mbahet prej gati një jave festivali Takimet e Teatrit ‘Kadri Roshi’, event që përkon me 50 vjetorin e themelimit të Teatrit ‘Zihni Sako’. 7 trupa teatrore nga qytete të ndryshme të vendit, por edhe nga Shkupi, kanë performuar në skenën gjirokastrite. Por me ç’duket deri më tani të paktën, prefektit të qarkut, Astrit Aliaj, më shumë në sy i paska rënë vetëm trupa e Teatrit ‘Petro Marko’ në Vlorë, prandaj i ftoi në zyën e tij një ditë më parë. Dhe siç thotë ai ‘për t’i falenderuar personalisht’ për komedinë ‘Sundimi i Gruas’.
Të jetë vallë rastësi apo thjesht çështje gustosh, që mes 7 trupave teatrore prefektit i krijoi më shumë emocion trupa e Vlorës? Por edhe në qoftë kështu, duket pa takt dhe e qortueshme që prefekti të ‘sajdisë’ vetëm një nga 7 trupat që kanë mbërritur në Gjirokastër. Nëse ai shtron ‘tapet të kuq’ për njërën prej trupave, duhet ta bëjë këtë gjë edhe për trupat e tjera, të cilat pavarësisht shijeve artistike që mund të ketë prefekti, mbartin vlerat e tyre artistike. Megjithatë zor të mendosh se pritja për trupën e Teatrit ‘Petro Marko’ të Vlorës të jetë rastësi.
Thjesht prefekti me origjinë nga Vlora, bëri qokën e vet përballë aktorëve të qytetit të tij. S’ka asnjë problem përse ai priti aktorët e Vlorës në zyrë, por kur nuk pret edhe aktorët e qyteteve të tjera që kanë ardhur për një ngjarje të rëndësishme, ky është standard i dyfishtë dhe jemi para faktit që Astrit Aliaj përdor postin e prefektit të qarkut Gjirokastër për qoka personale.
Privatisht ai është i lirë t’i presë e ‘sajdisë’ bashkëqytetarët e tij, por kur hap dyert e Prefekturës dhe i pret si zyrtar i këtij shteti, duhet të veprojë në këtë mënyrë edhe me 6 trupat e tjera. Në këtë rast prefekti i Gjirokastrës, jo vetëm që vepron me dy standarde, por s’i shpëton dot as patriotizmit lokal. Sepse nuk është se vetëm priti një nga 7 trupat dhe la gjashtë të tjerat, por jo rastësisht shkon e pret trupën e qytetit të tij. Në këtë pikë, Astrit Aliaj ngjan me Armand Hilajn, që 60 milionë lekë fond të Këshillit të Qarkut, i çoi për asfaltimin e rrugës së fshatit të tij.
©ArgjiroLajm.net
