Drejtori Ekzekutiv i Fondit Shqiptar të Zhvillimit, Benet Beci priti përfaqësues të shoqatës “Gjirokastra” të cilët u njohën me paketën e investimeve, që po ndërmerren në këtë bashki në kuadër të programit “Për Zhvillimin e Integruar Urban dhe Turistik”, që financohet nga qeveria shqiptare dhe Banka Botërore.
Sipas Beci takimi ishte i veçantë ashtu si vetë ndërhyrja rivitalizuese qe po kryhet në këtë qytet, një nga pasuritë arkitektonike e kulturore të njerëzimit.
“Janë 15 milionë Euro që do të investohen në të gjithë qarkun e Gjirokastrës. Në qytet do të investohet për rekuperimin e krejt rrjetit inxhinierik në qendrën historike, për përforcimin e qëndrueshmërise tektonike dhe restaurimin e godinave muzeale,” tha Beci.
Në emër të FSHZH , Drejtori Ekzekutiv falenderoi personalitetet për preokupimin qytetar, sugjerimet, përvojën e ofruar dhe rekomandimet me vlerë. Në emër të stafit, Beci i siguroi të pranishmit se kjo ndërhyrje inxhinierike në një nga sitet më të vlerësuar turistik, padyshim do jetë një standard i ri në punimet dhe mentalitetin investues. “Ky investim do t’i shërbeje rritjes së fluksit turistik dhe zhvillimit ekonomik e turistik të qytetit, rajonit e më gjerë,” theksoi ai.
Nga ana tjetër, përfaqësuesit e shoqatës dhe specialistët shprehën vlerësimin maksimal për investimet në Gjirokastër. Investime që për ta ishin të shumëpritura.
“Për Zhvillimin e Integruar Urban dhe Turistik” që zbatohet nga Fondi Shqiptar i Zhvillimit financohet nga qeveria shqiptare me mbështetjen e Bankës Botërore. Paketat e investimeve në infrastrukturë dhe produkte turistike në zonën që përfshin bashkitë Gjirokastër, Përmet, Berat dhe Sarandë kapin shifrën e 63 milionë Eurove.
Në Gjirokastër investimet fokusohen në restaurimin e kalldrëmeve, ndriçimin e Qafës së Pazarit dhe rehabilitin e hapësirave urbane, përmirësimin i aksesit në kala, rivitalizim i rrugëve ndërlidhëse për të lehtësuar mobilitetin e qytetarëve dhe turistëve dhe sistemin e ri të muzeve sipas një koncepti të ri dhe bashkëkohor.
Si portë kryesore kufitare me Greqinë në Gjirokastër kryqëzohen akse korridoresh kombëtarë të rëndësishëm, ç’ka e bën atë një pol të rëndësishëm ekonomik dhe turistik jugut.
