Pas ceremonisë së mbajtur në Bularat për të dyzetat e Kacifas, reagon kunati i këtij të fundit, Evangelis Sakellarakis. Papritmas, akuzat e tij kanë ndryshuar teksa më herët ai e drejtonte gishtin drejt shtetit shqiptar si fajtor për ngjarjen në Bularat. Tashmë, sipas tij, Turqia po nxit përplasje mes Shqipërisë dhe Turqisë.
Teksa foli para mediave, kunati i Kacifas bëri thirrje që Rama dhe Cipras të diskutojnë e të gjejnë një gjuhë të përbashkët.
Çfarë problemi keni pasur?
Personalisht nuk kisha asnjë problem, por kishin problem të tjerët, kishin shumë probleme. Në 10 veta, 8 u kthyen mbrapsht.
Përse mendoni se ka ndodhur kjo gjë, për sa kohë ju vetë nuk kishit probleme?
Unë e kuptoj që në të dy anët e kufirit ekzistojnë njerëz që nuk duan miqësinë mes dy popujve, por unë kam një mesazh për t’i transmetuar popullit dhe drejtuesve të shteteve nëpërmjet jush, që e ardhmja jonë është Evropa. Ne duhet të bashkëpunojmë, ne duhet të kemi flamurin tonë, ju duhet të keni flamurin tuaj, ne duhet të kemi besimin tonë, ju duhet të keni besimin tuaj, por ama duhet ta shikojmë veten të lidhur bashkë dhe në bashkëpunim me njeri-tjetrin.
Me këto që thoni, do të thotë se ju nuk jeni dakord me thirrjet anti-shqiptare që u hodhën në ceremoninë për Kacifas?
Parulla anti shqiptare nuk u dëgjuan, u dëgjuan parulla të tjera. Por u dëgjuan nga të dyja anët. Ne duhet t’i ndalojmë ato. Edhe Konstandino të njëjtën gjë ka thënë, nuk është drejtuar asnjëherë kundër një shqiptari. Edhe kur mamaja e tij i tha që çfarë po bën, do të vrasin, tha që nuk më vrasin se edhe policët fëmijë kanë dhe marrin një rrogë shumë të vogël në muaj. Pra, dhe Konstandinos nuk shfaqi qëndrime të kësaj natyre.
Dua t’i lutem kryeministrit tuaj zotit Rama dhe kryeministrit tonë zotit Cipras të gjejnë një gjuhë të përbashkët për të kapërcyer këto probleme. Ne duhet të jemi bashkë, ne duhet të punojmë bashkë dhe duhet të gjejmë një gjuhë të përbashkët.
Dua t’ju them dhe diçka tjetër, është se Turqia në rastin konkret nuk ndihmon miqësinë mes dy popujve. Ne dhe Shqipëria jemi një familje dhe familja i zgjidh problemet brenda vetes dhe nuk pret ndihmën e të tretëve. Në këtë rast Turqia nxit përplasjen mes nesh. Dua të them edhe diçka të tjetër, vetëm të vërtetën. Ju e patë që këtu nuk ndodhi absolutisht asgjë, por ishte e papranueshme dhe e dënueshme ajo që ndodhi me policinë, e cila ndaloi dhe ktheu gjithë ata njerëz që donin të vinin sot këtu, do shkonin dhe në Gjirokastër, do kontaktonin me njerëz, do lidheshin dhe kjo lidhje do ndihmojë për njohje të mëtejshme dhe bashkim të mëtejshëm. Unë i them këto me shumë sinqeritet.
